पुरानो हुँदैन माया मुहूर्त

प्रेमकथामा आधारित चलचित्र 'पुरानो हुँदैन माया'को निर्माण सुरु भएको छ । नूतन सिनेमा स्टुडियोमा आयोजित समारोहमा सोमबार चलचित्रको मुहूर्त गरियो । सन्दिप भुषालले निर्माण गर्ने चलचित्रलाई दीपक श्रेष्ठले निर्देशन गर्नेछन् । सुटिङ पनि उक्त स्टुडियोबाटै थालिएको छ । निर्माता, निर्देशक, प्राविधिक र कलाकारले एकसाथ मुहूर्त गरे ।

 

 

 

फेन्टासी श्रेणीको चलचित्रमा शिव श्रेष्ठ, निर्मल सेन्चुरी, सुमिना घिमिरे, जिया केसी, सृजना बस्नेत, हेमन्त बुढाथोकी लगायतको अभिनय हुनेछ । नायक सेन्चुरीले चलचित्रबाटै डेब्यु गरेका छन् । निर्देशक श्रेष्ठको कथा रहेको चलचित्रको सुटिङ काठमाडौं, पोखरा र दाङमा गरिनेछ । देव महर्जनको एक्सन र कविराज गहतराज तथा शंकर विसीको नृत्य निर्देशन छ ।

 

 

 

त्रिकोणीय प्रेमकथामा आधारित चलचित्रलाई निर्माण पक्षले सांगीतिक पनि भनेको छ । 'चलचित्रमा हामीले प्रेमकथा र संगीतलाई विशेष जोड दिएका छौं' मेरोसिनेमासँग कुरा गर्दै निर्देशक श्रेष्ठले भने 'प्रेममा उमेर र समयको अवरोध हुँदैन भन्ने सार चलचित्रले दिनेछ ।' पाका अभिनेता शिव श्रेष्ठ लामो समयपछि चलचित्रमा देखिन लागेका हुन् ।